Vuođđogálggat fágas
Vuođđogálggat leat integrerejuvvon gelbbolašvuođamihttomeriide gos dat leat mielde ovdánahttime fágagelbbolašvuođa ja leat maid oassin das. Geografiijas ipmirduvvojit vuođđogálggat ná:
Máhttit njálmmálaččat ja čálalaččat ovdanbuktit geografiijas sisttisdoallá muitalit báikkiid ja čilget gaskavuođaid ja árttaid, ja digaštallat ja ákkastallat geográfalaš temáid vuođul. Čálalaš ja njálmmálaš ovdanbuktinnákca mearkkaša máhttit reflekteret iešguđetlágan dieđuid ja gálduid sisdoalu birra ja vuođustit iežas oaiviliid. Dát sisttisdoallá ovdandivvut iežas barggu bohtosiid čielgasit ja dainna lágiin ahte earát ipmirdit.
Máhttit lohkat geografiijas sisttisdoallá suokkardit ja geavahit teavsttaid ja eará gálduid ja reflekteret daid birra. Máhttit lohkat dahká vejolažžan muosáhit ja ipmirdit fenomenaid, báikkiid ja olbmuid. Dat mearkkaša kritihkalaččat ja analyhtalaččat lohkat ja dulkot kárttaid, govaid, tabeallaid ja govvosiid ja diehtogirjjiid.
Máhttit rehkenastit geografiijas sisttisdoallá gieđahallat ja buohtastahttit lohkomateriála geográfalaš fáttáid birra ja dulkot tabeallaid ja gráfalaš ovdanbuktimiid. Rehkenastingálggat leat eaktun máhttit ráhkadit tabeallaid ja gráfaid ja rehkenastit gaskkaiguin ja kártta mihttolávain.
Máhttit geavahit digitála reaidduid geografiijas sisttisdoallá suokkardit neahttabáikkiid, viežžat relevánta dieđuid ja gulahallat neahta bokte geográfalaš temáid birra, atnit gáldokritihka ja muđui jierpmálaččat atnit Interneahta ja háhkat dieđuid persovdnagáhttema ja dahkkivuoigatvuođaid birra. Dat sáhttá maid mearkkašit ahte atná geográfalaš diehtovuogádagaid ja digitála reaidduid iežas bargguid ovdanbuktimiin.