Fága váldooasit
Fága lea juhkkojuvvon váldoosiide maidda leat hábmejuvvon gelbbolašvuođamihttomearit. Váldooasit dievasmahttet nuppit nuppiid ja fertejit gehččojuvvot oktavuohtan.
Joatkkaoahpahusas lea geografiija biddjon cehkiide Jo1 dahje Jo2 studerenráhkkanahtti oahppoprográmmain, vrd. Joatkkaoahpahusa fága- ja diibmojuogu.
Geografiijas leat gelbbolašvuođamihttomearit maŋŋel Jo1 studerenčiekŋudahtti oahppoprográmmaid čuovvovaš prográmmasurggiin: servodatfága ja ekonomiija, realfágat ja giellafágat.
Geografiijas leat gelbbolašvuođamihttomearit maŋŋel Jo2 hábmenfágaid prográmmasuorggis studerenčiekŋudahtti oahppoprográmmain / musihka, dánssa, dráma ja falástallanfágaid oahppoprográmmain.
Bajilgovva váldoosiin:
| Jahkeceahkki | Váldooasit | |||
| Jo1/Jo2 | Geográfalaš gáldut ja reaiddut | Eanadat ja dálkkádat | Resurssat ja ealáhusdoaimmat | Demografiija ja ovdáneapmi |
Geográfalaš gáldut ja reaiddut
Váldooassi geográfalaš gáldut ja reaiddut fátmmasta geavahit kárttaid, govaid, báikenamaid, statistihka ja geográfalaš diehtovuogádagaid.
Eanadat ja dálkkádat
Váldooassi eanadat ja dálkkádat gieđahallá eatnama siskkáldas ja olgguldas fámuid, ja maid dat leat mearkkašan go eanadagat hápmašuvve. Váldooassi suokkarda ja kárte luonddueanadagaid ja kultureanadagaid gaskavuođa ja eananamahusaid ja báikenamaid gaskavuođa. Váldooasis lea guovddáš dálkkádatfáktoriid ja dálkkádatrievdamiid ja áigeguovdilis luondduroasuid sujaid ja váikkuhusaid birra.
Resurssat ja ealáhusdoaimmat
Váldooassi resurssat ja ealáhusdoaimmat gieđahallá maid resurssat mearkkašit báikádeapmái, ealáhusovdánahttimii ja ássamiidda ja dasa gullá maid árvvoštallat báikádanfáktoriid mat čatnasit dálá máilmmiviidosaš ekonomalaš doaimmaide.
Demografiija ja ovdáneapmi
Váldooassi demografiija ja ovdáneapmi gieđahallá álbmot- ja ássanteoriijaid, olmmošlohkoovdáneami ja fárremiid eatnamis. Váldooassi fátmmasta eanet- ja unnitloguid, gefiid ja riggáid gaskasaš juogadeami ja erohusaid, ja dasa gullá maid ságaskuššat iešguđetlágan ovdánanmálliid.