Geografiija - studerenčiekŋudahtti oahppoprográmmaid oktasašfága - sámi oahppoplána
Fága ulbmil
Geografiijafága ulbmil lea ovdánahttit diđolašvuođa luonddu ja olbmoráhkadan birrasiid oktavuođa birra. Fága oahpahus galgá arvvosmahttit ohppiid oaidnit buvttadeami ja geavaheami gaskavuođaid ja ságaskuššat movt areála- ja resursageavaheapmi váikkuhit birrasii ja guoddevaš ovdáneapmái.
Geografiija galgá addit vuođu ipmirdit álbmotovdáneami, kártet resurssaid juogadeami, čilget ovttaláganvuođaid ja erohusaid ja digaštallat nuppástuvvanproseassaid maiddái eamiálbmotgeahččanguovllus. Fága galgá addit ipmárdusa das movt luondduriggodagat, dálki ja dálkkádat leat leamaš mielde mearrideame ássamiid ja servodagaid ovdáneami. Geografiija galgá maid duddjot ipmárdusa das manne resurssat leat deaŧalaččat máilmmiviidosaš buvttadeapmái, bargojuhkui ja ássamiidda. Álbmotovdáneapmi ja máilmmiviidosaš ekonomalaš proseassat váikkuhit ekonomalaš ovdáneapmái ja dasa movt máilmmiviidosaččat juogadit buriid.
Geografiijafága galgá addit bajilgova ja čilget báikkiid báikádemiid ja lunddolaš ja olbmodahkan diliid viidáneami eatnamis. Geografiijafága galgá veahkehit ipmirdit ja hálddašit dálá áiggi diehtolána. Eambbo máhttu movttiidahttá ja arvvosmahttá dáiddu kritihkalaččat analyseret ja ollislaččat ipmirdit. Dát sáhttá addit oahppái buori vuolggasaji searvat ovdánahttimii sámi servodagaid ja stuora servodaga konstruktiivvalaš vugiin. Geografiijafága deaŧalaš ulbmilin lea maiddái ovdánahttit gierdilvuođa ja máilmmiviidosaš mielovddasvástádusa ohppiid guovdu.